درس عن الغضب

(مقال عن ضبط النفس)

الشعور بالغضب هو واحد من المشاعر الاساسية في تكوين الانسان..

والشعور بالغضب.. ناس كتير تفتكره خطية.. لكن ربنا خلقنا بنى ادمين، بنحس.. بنفرح ونزعل ونخاف ونتفاجئ ونغضب..

وعلى فكرة .. في الكتاب المقدس اتذكر الغضب فوق ال ٤٠٠ مرة..
منهم ٣٧٥ مرة اتقال ان الله هو اللى غضب..

مكانش ينفع ربنا يشوف خطية الناس ومايغضبش..

الله غضب مرات كتير على شعبه..

موسى غضب قدام العجل الذهبي..

ربنا يسوع المسيح كان بيغضب من الكتبة والفريسيين..

فاحنا مينفعش نقول على مشاعر الغضب انها خطية..
لسببين:
١. ان ربنا خلقنا بنى ادمين وبنحس..
٢. ان ربنا نفسه غضب..

طبعا انا لو وقفت هنا.. هخليكم تعملوا كوارث..
كل واحد غضبان من حد هيروح ينفجر في وشه..
لكن طول بالك خد الكلام على بعضه، بلاش ناخد الجزء اللى يريح ضميرنا ونسيب باقي الكلام.

قلنا ان مشاعر الغضب مش خطية..

امتى يبقى الغضب خطية ؟

فيه سؤالين مهمين اوى لازم ارد عليهم لما اشعر بمشاعر الغضب..
عشان اعرف اذا كان الغضب ده خطية وللا لأ..
١. الدافع او السبب ميكونش خطية .. حقد او كره..الخ.
٢. اسلوب التعبير عن الغضب. يكون غير مؤذي.
** دافع مقدس - و بدون أذى

الشرح:
١. انا غضبان ليه؟ ايه الدافع او السبب؟
المسيح غضب على الكتبة والفريسيين .. واتكتب عنه في انجيل مرقس انه نظر اليهم بغضب..
س: ليه؟ ليه غضب منهم؟
(سؤال حواري دقيقتين)..
ج: غضبان من كتر حزنه عليهم..
فَنَظَرَ حَوْلَهُ إِلَيْهِمْ بِغَضَبٍ، حَزِينًا عَلَى غِلاَظَةِ قُلُوبِهِمْ،
مرقس ٣: ٥

ربنا بيغضب يا اما من كتر حبه لينا، وزعله علينا اننا سايبين نفسنا للشيطان يدمرنا..
وبيغضب برضو من الخطية لأنه قدوس.. فمش بيحتمل الشر او عدم القداسة..
(الدافع مقدس)

احنا بنغضب امتى؟ ايه اللى بيخلينا نغضب؟
سؤال حواري.

هيقولوا: لما حد بيغلط فينا.. او لما حد بيتفوق او بيخدعنا..

هنا السؤال الاول: ايه اللى خلاك تغضب؟ هل كرهك للخطية؟ او انك بتحب الشخص ومش عايزه يخسر ابديته؟؟

السؤال التاني؟
ازاى بتعبر عن غضبك؟
بالانتقام؟

رومية ١٢
لا تنتقموا.. على قدر طاقتكم سالموا جميع الناس..

إزاى اقلل من غضبي:

١. لا تبرر غضبك.. ان طبعك كدة.. او تلوم الأسباب.. بل اتعلم الهدوء..
انت تقدر تتحكم في غضبك. لو انت عايز..
الدليل: انك نفس الشخص.. لكن ساعات بتسيب نفسك تغضب.. وساعات بتمسك نفسك..
يعنى واحدة في البيت عصبية ومطلعة عين بابا وماما في البيت.. وطول الوقت خناق وصوت عالي..
تعالى شوفها مع الشلة.. كيووووت وهاديااااااا.. نسمة ..ملاك.. بلسم يتحط ع الجرح يطيب. وتكلمها ترد بصوت واطيييييي.. تقول لها على صوتك عشان اعرف اسمعك.. تقول لك معلش صوتى واطي شوية.. وهى في البيت سرينة بوليس صوتها يجيب اخر الشارع..

والولاد نفس النظام . نفس البرنامج.. .. بس ساعات الولاد فيه منهم العكس.. تباقيه ق
ام باباه محترم اوى.. مبينطقش.. لكن شوفه في المدرسة او في الكنيسة.. لو ولد بس عدى من جنبه وشكله معجبش البيه ده.. تلاقى قامت خناقة من مفيش.. وتحاول تفهم بيتخانف
قوا ليه؟ متلاقيش سبب..

قايين في تكوين ٤. وانت تسود عليها..

+ لما تحس بغضب ، عد من ١ الى ١٠ في سرك ببطء.

+ فكر ثوانى قبل ما تتكلم.. الراس الاول. وبعدها الودن. وفي الاخر الفم.

+ أخّر كلامك شوية..
لأنك عند الغضب.. حتى لو كان كلامك صحيح. فأسلوبك يكون خطأ..
و ده اللى بيخلينا ساعات نتكلم ، ورغم اننا بيكون معانا حق ، لكن نطلع غلطانين عشان اسلوبنا.

"مالك نفسه خير ممن يأخذ مدينة"
أم ١٦ : ٣٢

+ اتكلم وفضفض مع حد قريب منك.. وهنا فايدة الصحاب..
او اتكلم مع ربنا أحسن من الكل..

+ قلل من الموبايل.. الحلويات.. العب رياضة..
الحاجات دى بتحسن المزاج و الهرمونات اللى جسمك بيفرزها.

+ قاعدة : انا (احتياج) وانت (مدح) .. صباع واحد بيشاور على اللى قدامي و٣ صوابع بيشاوروا عليا.

٢. إعرف نتيجة غضبك انها بتكون مدمرة احيانا..
قصة الحائط والمسامير.. المسامير سابت أثر حتى بعد ما اتشالت.. زى الغضب بيجرح الناس حتى لو اعتذرنالهم.

٣. اوعى تاخد قرار وانت غضبان.. ابدا.
ولا تعطى وعد وانت فرحان.

٤. إعرف ان ربنا يقدر يغيرك..
موسى النبي غضب كام مرة؟
٣ مرات.. قتل ، كير لوحى الشريعة ، ضرب الصخرة..
لكن بعد ما اتعلم من ربنا.. أصبح اكتر واحد باله طويل..
عدد ١٢: ٣ "وأما الرجل موسى فكان حليما جدا اكثر من جميع الناس الذين على وجه الأرض"

يبقى اللى خلى واحل غضوب كدة يتغير.. يبقى انا كمان ممكن اتغير.

الآية :

اغضبوا ولا تخطئوا. لا تغرب الشمس على غيظكم. ولا تعطوا ابليس مكانا
افسس ٤ : ٢٦ ، ٢٧

شارك الفكرة مع خدام آخرين ✨

2407

** لا توجد تعليقات على هذه الفكرة..