احنا فاهمين ربنا غلط

(قصة عن عيد القيامة)

في زفة القيامة في قداس العيد ، كان أبونا بيشوي ماسك الشورية .. وبيبخر قدام أيقونة القيامة ، في وسط الشعب المتهلل ليلة عيد القيامه المجيد .. وبعدين هو لاحظ شاب حاطط ايده علي خده، و واضح عليه الحزن والإكتئاب !!

أبونا بيشوي بسرعه أعطي الشورية لأبونا تادرس يعقوب .. وساب زفة القيامة!! .. وذهب للشاب ده وقاله بحب وإبتسامة .. ممكن أحكي معاك شويه بره صحن الكنيسة ؟؟! ..
خرج مع أبونا في خطوات بطيئة كلها إعياء !! .. بادره أبونا بحب : إيه يا حبيبي مالك ؟ إيه إللي مزعلك ؟؟!

- أنا يا أبونا تعبان من كل ناحيه .. الخطية حطمتني نفسيًا وجسديًا وماديًا ..
أنا هنا طالب مغترب .. ومشيت مع الأشرار .. أنا من يأسي .. ركبت الترام وأنا نفسي أتخلص من حياتي !!؟.. ومعرفش إن فيه عيد ؟!! .. لقيت الكنيسة منوره .. نزلت ودخلت .. حتي أنا مش عارف إيه خلاني اجي هنا !!؟ ..

أبونا حضنه بحب وأهتمام وقاله : ياحبيبي اللي جابك هنا هي محبة ربنا ليك .. انت غالي عليه جدا .. هو إتصلب ومات وقام علشانك .. ودمه يغسلنا من كل خطية .. يلا بينا نقف نصلي مع بعض .. وتتناول النهارده !! ..
- لا .. لا .. إلا التناول يابونا !! .. أنا مستحقش .. إنا مش معقول بقي يلمس جسد ربنا .. ده مش ممكن أبدا !! ..
- يا حبيبي إحنا فاهمين ربنا غلط .. ده هو بنعمته ومحبته جه علشانا إحنا الخطاه .. علشان دمه الكريم ليه القدره إنه يطهرنا من كل خطيه .. وإحنا ربنا عطانا فرصه ثمينة خسارة كبيرة إننا نضيعها .. وإحنا النهارده في ليلة عيد القيامة، ربنا عايزنا نقوم بقوة قيامته من موت الخطية .. ونقدم توبة من قلبنا ، وناكل جسده المقدس اللي هو خبز القيامة.

" أنا هو الخبز الحي الذي نزل من السماء ، إن أكل أحد من هذا الخبز يحيا إلي الأبد " (يوحنا 51:6 )

موضوعات مرتبطة بالفكرة :
#محبة الله لنا

385

شارك الفكرة مع خدام آخرين ✨

** لا توجد تعليقات على هذه الفكرة..