نجني من الدماء يا الله

(تأمل عن الحروب الروحية)

نجني من الدماء يا الله، إله خلاصي!
فيبتهج لساني بعدلك!

دماء الناس اللي تعبناهم،
وأرهقناهم،
ودسنا محبتهم،
في ازمنة القساوة والأنانية،
دماء الناس اللي أعثرناهم،
وظلمناهم،
سواء بعلم او بدون علم،
بقصد او من غير ما نقصد!

النفوس اللي تعبت بسببنا،
اللي اتعطلت خطوة بسببنا،
اللي دسنالهم علي طرف،
واللي جرحنا مشاعرهم،
واللي تجاهلناهم واللي تخلينا عنهم،
واللي اتغيرنا ناحيتهم،
واللي كان ليهم عشم فينا وخذلناهم،

اللي مخدمناهمش،
واللي خدمناهم بأستهتار،
واللي عاملناهم بإستهانة،
واللي مقدرناهمش حق تقديرهم،
واللي ما اكرمناهمش وكانوا يستحقوا الإكرام،
واللي ماشفناهمش وعبرنا بجوارهم
وكان ينبغي نقف ونهتم ..

اللي كان بأيدنا نسندهم، ومسندناش،
اللي كان بأيدنا نطبطب عليهم،
وما طبطبناش،
واللي بدال ما نساعدهم كسرناهم،
واللي كنا حمل تقيل علي كتافهم
وعمرنا ما شكرناهم!

كل دي دماء في ايدينا
نصرخ مع داود،
نجينا يارب من الدماء..

وصلح اللي كسرناه وخربناه في الآخرين،
زي ما صلحت
وبتصلح، اللي خربه وكسره الآخرين فينا!!

- أرساني

شارك الفكرة مع خدام آخرين ✨

570

** لا توجد تعليقات على هذه الفكرة..