عشانك - فقرة رائعة عن آلام المسيح

(تأمل عن الصليب وأسبوع الآلام)

معلومات من فيلم الام المسيح ( اخراج ميل جيبسون سنة 2004 )

1 - فى الصورة الاولى هتلاقى دمية .. دا لان فى الفيلم مشاهد كتير كان من المستحيل ان الممثل او اى دوبلير حتى يعملها ... زى مشهد قلب الصليب على الارض والمسيح متعلق عليه او مشهد موت المسيح .. او مشهد غرس الحربة فى جنبه ...

المشاهد دى كلها كان من رابع المستحيلات ان اى انسان ينفذها لان نسبة المخاطر فيها عالية جدا ...
سنة 33 ميلاديا يوم الجمعة .. المسيح عمل المشاهد دى كلها بنفسه ، عشانك .. ؛

2 - الصورة التانية بيقول عنها الممثل Jim Caviezel اللى ادى دور المسيح انه كان لازم كل 5 - 10 دقايق بالكتير اوى يوقفوا التصوير عشان يريح جسمه ويقدر ياخد نفسه ، لان وضع الصلب كان من المستحيل معاه انك تاخد نفسك الا وانت بتضغط بقوة برجلك على الصليب عشان تساعد الرئتين انهم يتنفسوا ..

سنة 33 ميلاديا يوم الجمعة .. المسيح اتعلق 6 ساعات على الصليب وبيعصر رجله فى مسامير الصليب عشان ياخد نفسه ، عشانك .. ؛

3 - الصورة التالتة بيقول عنها الممثل انه كان شايل الصليب وكان فى المشهد دا من المفترض ان الصليب بيقع وواحد من الجنود بيلحقوا وهو بيقع عليه .. لكن الممثل خانه الحظ ومحدش لحقه .. فالصليب فعلا وقع على راسه واتصاب ساعتها ووقفوا التصوير عشان يطمنوا عليه

سنة 33 ميلاديا يوم الجمعة .. المسيح مشى طول الطريق من قصر بيلاطس للجلجثة والجنود ما بيعملوش حاجة غير انهم بيوقعوه ويستهزاوا بيه ، عشانك .. ؛

4 - الصورة رقم 4 وفيها ان جلدة من جلدات العصيان ( مش السياط ) فلتت من ايد واحد من الممثلين ونزلت على ضهر الممثل ؛ فعملت له الاصابة اللى فى الصورة !!

سنة 33 ميلاديا يوم الجمعة ...
المسيح استحمل 39 جلدة باصعب انواع السياط الرومانية ، عشانك .. ؛

5 - الصورة رقم 5 تلاحظ ان كل اللى فى الصورة متقلين جدا فى اللبس لان الجو كان شتا .. اما اللى بيمثل دور المسيح فكان بيحاولوه يدفوه باى طريقه اما انهم يغطوا جزء من جسمه او يستخدموا دفايات هوا ساخن ..

سنة 33 ميلاديا يوم الجمعة ...
المسيح ظل 6 ساعات عارى فوق الصليب
ويوم ما طلب كباية مية .. ساقوه خل ،

#عشانك ... !!

شارك الفكرة مع خدام آخرين ✨

1010

** لا توجد تعليقات على هذه الفكرة..