إضافة للمفضلة

استخدام الفكرة

إبلاغ عن مخالفة

ماركو برسوم
2025-08-28

عفركوش وبرتكوش فى عيد النيروز

(اسكتش عن عيد النيروز)

حوار بين عفركوش وبرتكوش

اسكتش كوميدي للاطفال فى عيد النيروز..

( يجلس مجموعة من الأولاد بين ملاكين ويلبسونهم تيجان ، ويظهر اثنين من الشياطين يرتدون ماسكات ويدور بينهم الحوار التالي)

تحذير : إذا كان سن الأولاد صغير لا يجب ان تكون ماسكات الشياطين مخيفة ولكن ممكن أن تكون رسوم كرتونية ، ويتم ارتدائها أمام الأولاد لإلغاء عنصر المفاجأة .

شيطان 1 : (وهو يضرب شيطان 2) ليك عين توريني وشك بعد اللي عملته يابوز المصايب ؟ انت المفروض تحبس نفسك وماتخرجش أبداً .
شيطان 2 : ليه بس يامعلمي أنا عملت إيه ؟

شيطان 1 : مش عارف نيلت إيه ؟ بقى أقولك تروح تخللي المسيحيين دول يبخروا للأوثان تقوم تسيبهم يستشهدوا يافالح ؟
شيطان 2 : أعمل ايه بس يامعلمي ؟ ما انا حاولت كتير لكن هما متمسكين بالمسيح ؟

شيطان 1 : طيب ماتكلمتش ليه في ودان الوالي انه يكتر من العذابات شوية ياغبي ؟
شيطان 2 : أنا اتكلمت يامعلمي في ودانه وهو عذبهم كتير أوي .. لكن مافيش فايدة .. أعمل ايه بس ؟

شيطان 1 : شايف ياواد .. شايف فرحانين إزاي ، والملايكة بيحطولهم تيجان على راسهم والسما كلها عملالهم حفلة كبيرة ... لالالا أنا مش قادر أشوف المنظر ده ، مش قادر أسمع صوت الترانيم .
شيطان 2 : ده المصيبة الأكبر يامعلمي ، إنهم خللوا السنة اللي بقى فيها دقلديانوس ملك تبقى هي دي أول سنة في تقويم الشهدا ، وبيعملوا حفلة كبيرة في أول يوم فيها ، بيسموها عيد الفيروز .

شيطان 1 : فيروز مين ياللي تنشك في معاميعك ، اسمه عيد النيروز .
شيطان 2 : شايف يامعلمي أولاد مدارس الأحد مبسوطين إزاي (يشير للفصل) ؟ وشايف بياكلوا إيه ؟ جوافة وبلح .. أنا نفسي في الجوافة يامعلم أروح استلف واحدة منهم .

شيطان 1 : غبي .. غبي ، جوافة إيه اللي هتاكلها هو في شياطين بتاكل ياغبي ؟
شيطان 2 : آه صح نسيت ياريس أصل الجوافة شكلها حلو أوي ، ألا قوللي يامعلمي هما بياكلوا ليه جوافة وبلح ، مع إن البرقوق أحلى بكتير ؟

شيطان 1 : قال إيه يا سيدي البلح لونه أحمر زي دم الشهدا وقلبه أبيض زي قلبهم وبذره ناشف وقوي زي ايمانهم ، والجوافة كمان بيضه وشكلها شبه القلب كده وجواها بذر ناشف ، يعني احنا بدل ما ننكد عليهم خليناهم فرحانين وكمان عاملين حفلة !! مبسوط ياوش النحس ؟
شيطان 2 : وأنا ذنبي إيه يامعلمي ، طيب ماتروح تنكد عليهم إنت ياخويا مادام إنت شاطر كده .. بدل ما إنت شغال ضرب فيا ؟

شيطان 1 : (بصوت منخفض) هو دول حد يقدر عليهم !!
شيطان 2 : بتقول إيه ؟

شيطان 1 : (يتلخبط) أ أ أ بقول أنا هنا المعلم والحاجات دي شغلتك إنت ، أنا هنا اللي بدي الأوامر .
شيطان 2 : (بصوت منخفض) أهو ده اللي إنت فالح فيه ياخويا

شيطان 1 : بتبرطم بتقول إيه
شيطان 2 : ماببرطمش

شيطان 1 : لا بتبرطم ... بتقول ايه ؟
شيطان 2 : نانانانانانانانا

شيطان 1 : آه بحسب . أنا حاسس إني هايجرالي حاجة ، جبتلي المرض يابعيد
شيطان 2 : معلمي .. معلمي ، فوق يامعلمي .. جهنم محتجاك

شيطان 1 : يا مغفل دلوقتي كل الأولاد المسيحيين هايقلدوهم ، دي مصيبة كبيرة .
شيطان 2 : يقلدوهم إزاي بس يامعلمي ماهو مفيش حد بيموت ويستشهد أهه ، وكلهم عاملين حفلة .

شيطان 1 : الإستشهاد ياخروف العيد مش بالموت وبس ، يعني مش لازم يثبتوا حبهم للمسيح بالجلد والقتل .. وان كان ده بيحصل لغاية دلوقتي .. إحنا برضو بنخللي ناس بتتعذب وبتتقتل علشان هما مسيحيين وكنايس كتير بتتهد وبتتحرق علشان هي بتعبد يسوع ... لكن هما ممكن يعملوا حاجات تانية يشهدوا بيها للمسيح ويعيشوا منتصرين بالمسيح زي ما الإنجيل بتاعهم بيقولهم "يَعْظُمُ انْتِصَارُنَا بِالَّذِي أَحَبَّنَا" .
شيطان 2 : هايعملوا إيه يعني يا معلمي ؟

شيطان 1 : يعني مثلاً لما يجي يوم الجمعة ويكون الواحد فيهم نايم ومكسل ومش قادر يسيب السرير والنوم لذيذ قوي ، هايعمللي فيها بقى إبن الشهدا ويقول : لأ .. أنا لازم أقوم واروح الكنيسة ومش مهم النوم ..
شيطان 2 : آه صحيح .

شيطان 1 : حاجة تانية يامغفل .. لما يكون كل اللي حواليهم بيشتموا ويكذبوا ويحلفوا ويضربوا بعض زي ما احنا بنعلمهم .. هما هايرفضوا يسمعوا كلامنا ويعملوا زييهم ، ويقولوا : لأ ... مش ممكن نزعل بابا يسوع.. لأننا أقوياء زي الشهدا
ولو حد زعلهم أو ضايقهم هايستحملوه ويسامحوه ... يعني إحنا يافالح مش هنلاقي حد نشتغل عليه ، وبدل ماننكد عليهم هايفضلوا فرحانين كده على طول ويخشوا السما ويعيشوا مع القديسين ، وأنا وإنت بس اللي هانتشوشو في جهنم .
شيطان 2 : لا يامعلمي .. أنا مايرضينيش زعلك ، أنا لازم أنكدلك عليهم .

(يتجول شيطان 2 بين الأولاد ويعطيهم وصايا خاطئة وهم يرفضوا كلامه ، فيسحبه شيطان 1 من وسطهم ويضربه وهو يقول : فاشل .. فاشل .. طول عمرك هاتفضل فاشل )

شارك الفكرة مع خدام آخرين ✨